Dampa bial by-election a MNF official candidate Dr. R Lalthangliana chuan MLA-te hi Dan siamtu an nih mai bâkah, ram mipui rawngbawltu an nih avangin an hun chhûngin sûlhnu ṭha leh sawizui tlak rotling bial chhûng tan hnutchhiah tum a pawimawh ber fo, a ti a.

“Chumi ti tur chuan Pathian leh Dampa bial mipuite zarah theihtawp chhuah ka tum tlat dawn a. Pu Lalrintluanga Sailo-in hmachhawp a lo neih tawhte hlen-chhuah ngei ka tum,” tiin thawhpuiah Dampa bial mipuite leh he lai biala vote nei zawng zawngte a sawm.

“Kan sawi-ah ni loin kan thil tihah min lo teh zawk ṭhin turin ka ngen a che u,” Dr Thangtea chuan a ti.

Er. K Lalsawmvela MNF General Secretary pawhin thusawiin, Dr. Thangtea hi tun hmaa zirlai hruaitu ni thin, Shillong-ah MSU President hmasa ber a ni a. MNF anih atanga party danga la nghing chhin eih lo a ni, tiin “Mizo Nationalism thinlung pu dik tak” tiin a fak a ni.

Er. Sawmvela chuan India hmarchhak leh Central India pawhin Dr. Thangtea chu an mi hriat leh ngaih pawimawh a nih thu tarlangin, Minister anih a piangin a department enkawl reng rengte hneh tak leh chak taka enkawl thin a ni a. Amaha theihna awm leh a nihna tak hi pholang thei turin lo thlang tling u la, in inchhir ka ringlo, a ti bawk.